Haba Peuingat ( Nasehat )

By: Nardi Dinata

Wahee eo aneuk,keunoe keuh siat,
Tatulong peurap,hai bijeh mata,
Nabacut haba,uloen peuingat,
Bek sampee sisat,hai ayeum mata,

Hudep lam donya,ingat akhirat,
Nibak but bangsat,meubek tateuka,
Ingat hai aneuk,akan muhammat,
Pang ulee ummat,nabi mulia,

Bek that tagalak,ikoet but kaplat,
Singoeh meularat,azeub tarasa,
Dalam nuraka,hai neuk seu'um that,
Hinan keuh teumpat,ureung meudosa,

Hinoe didonya,hudep teuh siat,
Bukoen nyoe teumpat,silama lama,
Lhee boeh alam,geutanyoe teumpat,
Yang keuphoen meuhat,lam kandong poma,

Teuma keudua,nyan keuh alam jarat,
Keulhee akhirat,yang keukal baqa,

Yang saboeh alam,kalheuh talewat,
Dua boeh teumpat,yang goeh tateuka,
Seugolom hai neuk,keunan tapeurap,
Bek gadoeh ingat,masa lam donya,

Beuna tatakoet,siksa dalam jrat,
Hana pree saat,tuboeh geuhila,
Hinan kateudong,sidroe malaikat,
Bak jaroe geumat,busoe nuraka,

Pubut hai aneuk,laju beuleugat,
Keudeh tapeurap,nibak ulama,
Tajak meununtut,mangat bek sisat,
Supaya mupat,haleu ngoen riba,

Bek tameulaloe,hai nyak beuingat,
Siksa peudeh that,di alam baqa,
Hana soe tulong,tanyoe dalam jrat,
Limpeut ngoen ulat,keunan diteuka,

Uleu ngoen kala,keunan dipeurap,
Tuboeh teuh dikap,hai bijeh mata,
Meutan amalan,keubit saket that,
Azeub cukop brat,teunteei tarasa,

Pateh hai aneuk,yang loen peuingat,
Tanyoe meularat,nyoe ilmee hana,
Maka hai aneuk,beuna taingat,
Uroe akhirat,yang bantu hana,

Lheuh nyan hai aneuk,tutoe beugoet that,
Lidah leumik that,tuleung jih hana,
Puyang tapeugah,bek ban keumangat,
Beu ingat ingat,bak peulheuh haba,

Beugoet keuh akai,bek batat batat,
Beuna keuh adap,beusopan haba,
Ngoen ureung tuha,tanyoe beu adap,
Ngoen rakan meuhat,tutoe tajaga,

Hanya keuh ohnoe,haba peuingat,
Beuna taingat,hai ayeum mata,
Mangat bek teulah,bak saboeh saat,
Ohka beurangkat,u alam baqa,