TANLE BEUREUKAT

BY : Nardi Dinata

Assalamu'alaikum rakan fhan buhu
Barat ngoen timu mandum sahabat
Nibak saat nyoe Ca'e loen direu
Keunoe loen tabu bacut nasehat

Ranup kaloen boeh lam bungkoeh laju,
Ranup sigapu loenbi keu sahbat,
Keu bungong jaroe wahee e teungku,
Dak leupah gapu yang bek neu upat,

Wasit peuneusan loen keuneuk tabu,
Deungoe hai teungku  rakan sahabat,
Didalam hatee cit sabee rindu,
Loen keuneuk tabu haba amanat,

Sikada bacut loen seuboet laju,
Kadang cit laku  ek jeut keu ubat,
Adak pih panyang bek neukheun sapu,
Neubaca laju yangka loen radat,

Donya kaakhee macam dum taeu,
Kameng ngoen keubeu  rap beh rimung kap,
Eungkoet dila'ot disuroet laju,
Hantomle taeu yang punoeh pukat,

Cit karoeh meunan tuhan peulaku,
Seubab hai teungku  kadit yang taubat,
Tanlee taingat Allah tuhanku,
Jinoe pih laju neucok beureukat,

Beureukat tanlee padee tameu'u,
Yang ladoem taeu kabeh tikoh kap,
Hanjan abeh thoen katron jak meu'u,
Pijeut ngoen keubeu tuboeh teuh pucat,

Padee dalam blang meukarang bakmu,
Sang sang oh taeu meurambang sarat,
Tapih oh takoeh cit gadoeh laju,
Kahansep keu bu sabee meukarat,

Salah bak masa watee tameu'u,
Bak tapoh keubeu gadoeh ngoen ingat,
Gadoeh taikoet peuturoet nafsu,
Saket dikeubeu hana taingat,

Meunyoe meusem blang seumbahyang taeu,
Cit tinggai laju hana teuingat,
Sidumnan macam paki han karu,
Patoet tuhanku geucok beureukat,

Nanggroe kasuram cit katrang taeu,
Hanlee jiteupu hukom hazarat,
Aneuk deungoen ma hanalee sapu,
Oh tadeungoe su leumpah that jeungkat,

Tanlee seumbahyang pujoe tuhanku,
Peuturoet nafsu taeu diummat,
Ohban terjadi bala tuhanku,
Ramee dum taeu yang jak ibadat,

Harap keu jakeut nyan neuboeh laju,
Seumbahyang teungku bek tuwoe sahbat,
Seubab kalahee padee dum teu,
Masak simumu sipadee leukat,

Yang malem malem pakat bersatu,
Harapan teungku zakeut bak rakyat,
Oh bak bie jakeut laju meuhantu,
Seumbahyang teungku yang fhon meukumat,

Geukheun meukarat seubab geu meu'eu,
Teungoh teumabu pageu geuikat,
Geukheun cit sidroe hanaso bantu,
Teungoh geu meu'eu laen kageumat,

Meunan yang kayem ladom dum taeu,
Panyang that iku nyobak ibadat,
Oh rap meukawen laju geupeukeu,
Seumbahyang laju wap napuharap,

Seubab kameuheut keu ranup gapu,
Hatee jih rindu karang boh langsat,
Diwali nikah leumpahna lucu,
Dilikoet teungku tanging saleh that,

Hanjeutle tanggoh katroeh bak umu,
Diwali laju bagah geupeurap ,
Meunyoe seumbahyang kadang hanlaku,
Ija keuleumbu tuha lam lipat,

Oh lheuh meukawen kalaen buhu,
Diwali taeu kateuhah pusat,
Tanlee seumbahyang geutinggai laju,
Seubab kalaku ija palikat,

Seumbahyang awai takot keuteungku,
Supaya maju peunikah leugat,
Meunan keuh macam ragam dum taeu,
Peuturoet nafsu beu'ek troh hajat,

Oh ta'eu malem maken dum karu,
Seubab meujampu breuh bit ngon leukat,
Hanale meuri padee simeulu,
Teupong ngon gapu karoh meusapat,

Hanalee beda saka ngoen sabu,
Arak ngoen madu kajeut keu kicap,
Hukom lam nanggroe meubeda laju,
Beuthat leo teungku  hanjitem teupat,

Katrok bak masa meuputa iku,
Agama laju maken ubeut that,
Meunyoe bak babah Allah tuhanku,
Tapi bak laku cukop jeuheut that,

Aneuk mit cut cut neubeut hanaju,
Adakna teungku han'ek peuingat,
Meulasah tireh abeh meukamu,
Kameng ngon keubeu keunan jipeurap,

Teuma meuseujit kakeubit kaseungu,
Tanlee jiteup uroe jeumeu'at,
Seubab kasala khuteubah teunku,
Karoeh meujampu caci ngoen upat,

Koenlee nasehat ibadat geuyu,
Nyang keujeut karu sigala teumpat,
Teuma dirakyat cit batat lju,
Oh ji'eu teungku kalaen sikap,

Nyan ban keuhjinoe kana dumtaeu,
Suroh tuhanku kadit yang ingat,
Tinggai teuk tapreh wahee e teungku,
Mata uroe hu holaen teumpat,

Hanya keuh ohnoe loen tuleh buhu,
Meujampu jampu  asoe lam radat,
Meu'ah loen lakee bapak ngon ibu,
Bek neukheun sapu wahe e sahbat,

Diloen hana jeut bak karang buhu,
Atra meu'eu eu lagee gob riwat,
Beutoi goen salah neutegur laju,
Mangat loen teupu beu neupeuingat,

Munardi