Bek Sombong

By: Nardi Dinata

Keupu teuh harta kaya ngoen meugah,
Nyoe ureung susah hana tapakoe,
Seubab nyan harta titipan Allah,
Akan jeut punah bak saboeh uroe,

Pulom lam hatee na sifeut srakah,
Harta takeubah gadoh jih keudroe,
Hana beureukat dak tamong mudah,
Meutan seudeukah wahe rakan droe,

Hinoe didonya seugala mudah,
Adak talangkah uluwa nanggroe,
Seubab jai harta yang katakeubah,
Puyang tapeugah jai ureung pakoe,

Tapih oh matee meubaroe susah,
Harta yang meugah hana tapuwoe,
Tinggai keu aneuk puyang takeubah,
Kajimeurupah adun ngoen adoe,

Hideh lam uruk geubloeh geucah cah,
Siksa bak Allah hana pree uroe,
Seubab yoh udep cukop seurakah,
Harta meulimpah tapajoh sidroe,

Hantom tabagi keu ureung susah,
Hantom seudeukah gop tan tapakoe,
Malah harta gob yangna tarupah,
Yatim tajajah sabe tip uroe,

Ngoen ureung lingka hanatomna pah,
Sabe tahujah ciban galak droe,
Ureung keurija hantabi upah,
Meunan keuh tingkah siuroe uroe,

Ohka tamate meubaroe teulah,
Kanibak Allah talake lom woe,
Hanale guna dak tamoe darah,
Hanale jatah udonya tawoe,

Maka hai kawom beugot goet tingkah,
Beuna seudeukah wahe rakan droe,
Nabacut harta neubi le Allah,
Beugot tapapah bekna sombong droe

Ohno keuh mantong asoe risalah,
Didalam madah yangka loen pasoe,
Leubeh dan kureung loen lakee meuah,
Bak rakan sahbah adun ngoen adoe,

Saleum Aneuk Nanggroe