NASIB BADAN

Oleh : Nardi Dinata (Munardi)

Sudah dibacakan di Aceh TV Banda Aceh,oleh Medya Hus.

Awan peulimboet gunong seulawah,
Ujeun meuruwah keunoe udonya,
Deungoen izin poe katroh loen langkah,
Keunoe loen singgah bak Cek Medya,

Hajat lam hatee katrep meuleumpah,
Loen karang kisah keunoe uloen ba,
Beuthat pih tan jeut hai cek meutuah,
Teutap loen ilah keunoe loenjakba,

Karna bak but nyoe galak meuleumpah,

Koen keuh loen peugah keu gura gura,
Sabeei bak TV loen kaloen leumah,
Bak si-oen keurtah ca'e geubaca,

Deungoen irama macam geu olah,
Di Cek meutuah carong geubaca,
Bak Aceh Tv gamba deuh leumah,
Cukop that jeulah loen kaloen rupa,

Hanya keuh ohnoe keumukatdimah,
Beklee loen tamah panyang that haba,
Takoet meupaloe dumpue meupeugah,
Loen takoet salah nibak meuhaba,

Bukoenlee sayang loen kaloen tiwah,
Sayeup kapatah wap keunong nuga,
Teubit ie mata hai cek meutuah,
Bukoen loen peugah keupura pura,

Nyoe kisah nyata ca'e loen unggah,
Keunoe loen peugah bak rakan dumna,
Teuntang hudep loen neubi Le Allah,
Nam thon kaleupah meunoe loen rasa,

Sayang that padee uram kapatah,
Nacit yang reubah ie raya teuka,
Hudep loen jinoe beda meuleumpah,
Kheundak bak Allah sidroe yang esa,

Meunyoe baroe koen dumhoe jeut leupah,
Mantong glah langkah wahee syedara,
Teutapi jinoe hanalee keumah,
Seujak musibah padum thon yangka,

Ka awai janji mungken ngoen Allah,
Seugolom leumah lahee udoenya,
Dua ribee sikureung thon kaleupah.
Uloen musibah meupok ngoen honda,

Bak jalan raya hinan meuruwah,
Gaki loen patah saket lagoina,
Di kota matang teumpat musibah,
Watee pih sep pah mugrep diteuka,

Di uroe raya ramee meuleupah,
Cit ban that leupah buleun puasa,
Katroh janji diloen ngoen Allah,
Hanpat loen ilah kheundak rabbana,

Bak teungoh jalan laju loen reubah,
Dirakan sahbah pih luka luka,
Dua dikamoe laju dipinah,
Tuboeh meudarah teubit uluwa,

Laju loen diba nibak Puskesmas,
Rung loen meudarah dipeugleh sigra,
Diloen bak gaki sagai yang patah,
Rung pih meudarah akibat luka,

Keudeh bak uroet geuba loem bagah,
Ureung syik susah geuroe ie mata,
Laju pih geumat geu uroet bagah,
Teuma geupeugah patah nibak pha,

Gaki kakeumong luweu geuteutah,
Supaya mudah luweu geubuka,
Hinan keuh masa gaki loen parah,
Kareuna salah meujeut geuh hana,

Dimiyup teu-ot padahai patah,
Tapi geupeugah hideh nibak pha,
Hana geuronsen ohban musibah,
Laju that bagah bak uroet geuba,

Lheuh nyan geubaloet teubai meuleumpah,
Ya Masya Allah saket loen rasa,
Watee meukrot krot hanpu tapeugah,
Yang pah beubagah puleh beusigra,

Hokeuh siuroe metamah parah,
Sampee kabeukah asoe meuleu a,
Warna kahitam hanalee darah,
Ya masya Allah saket lagoina,

Dimiyup teu'ot bak teuntang patah,
Diteubit darah khep pih leumpahna,
Sikhan kamatee tanlena darah,
Diloen that susah nibak loen theun jra,

Teuma oh lheuh nyan geucok geupinah,
Keunoe geu ilah geuba ubanda,
Bak reumoh saket peutamong bagah,
Oh di'eu leumah doktor keucewa,

Nibak nyan malam laju dipeugah,
Ohban kaparah meubaroe neuba,
Meunan keuh narit teubit bak babah,
Oh di'eu leumah gaki loen luka,

Nyoe payah takoeh laju dipeugah,
Diloen hai sahbah teubit ie mata,
Laju teupikee hudep loen susah,
Ciban loen langka nyoe gaki hana,

Hudep kacacat ngoen gaki siblah,
Epoe ya Allah loen hana daya,
Ka awai gaki diwoe bak Allah,
Ka ohnan jatah neubi sempurna,

Gaki pih dikoh kakeuh loen pasrah,
Mandum Bak Allah loen seurah jiwa,
Beuthat pih cidra neubi le Allah,
Teutap loen tabah seureuta saba,

Meunan keuh nasib hai cek meutuah,
Neubi le Allah jinoe kacidra,
Tapi loen syukur Alhamdulillah,
Jinoe kamudah langkah loen hila,

Na gaki paslu hana that susah,
Alhamdulillah jinoe nyan kana,
Ngoen rakan cae panton hikayah (t),
Kalheuh eu leumah meutatap mata,

Hanya keuh ohnan ca'e loen kisah,
Loen lakee meu'ah kapanyang haba,
Meunyoe paneuk teuntee han jeulah,
Maka loen peugah panyang loen rika,

Uloen akhiri ngoen Hadanallah,
Meuribee meu'ah loen mohon pinta,
Neu maklum tuleung tanna bak lidah,
Namun hai sahbah tajam lagoina,

Ttd : Munardi

Foto kaki palsu yang sekarang sudah patah dua