KEUNONG PEUNGEUT

By : Nardi Dinàtà

Wate loen pike,akhee meuramah
Dalam bu kulah,racon dijampu
Han jeut loen bayang,loen ingat kisah
Masa kaleupah,ngoen adek ayu

Dibi harapan,masanyan indah
Diloen hai sahbah,pih seunang laju
Kareuna ngoen loen,ditem meunikah
Adak mak ngoen yah,pih ka geurestu

( Dikheun bak loen )

Meunoe keuh dikheun,bak loen dipeugah
Hai bang meutuah,bek jinoe laju
Neupreh hai cut bang,dang beh kuliah
Peurle ijazah,keu masa ukeu

Dua thoen timpoe,hai cut bang bebas
Droe neuh loen ikhlas,laen neu rayu
Tapi oh kabeh,masa kuliah
Baroe neu langkah,bak loen neu maju

Adak pih diloen,meunan cit tingkah
Yoh mantong bebas,golom nasapu
Geutanyoe dua,jinoe golom sah
Hai bang meutuah,loen bek neu ganggu

Nyopat keuh tanda,hai bang loen tarah
Keu tanda leumah,bukti nak neu eu
Bahwa geutanyoe,akan meunikah
Oh beh kuliah,dua thon ukeu

( Kujaweub le loen )

Kumat Sugata,lagee tapeugah
Tanda pih jeulah,kalheuh uloen eu
Mulai jinoe,ohnoe keuh sudah
Bahle loen langkah,holaen laju

Uloen preh masa,yangka tapeusah
Jinoe meutuah,han loen peukaru
Puyang gata kheun,mandum loen keubah
Eunteuk loen peuhah,nyoe katroh umu

Janji dua thon,tanyoe meunikah
Abeh kuliah,gata yu jak eu
Maka uloen preh,gata meutuah
Hingga troh jatah,dua thon laju

(Katrok 2 thoen )

Dua thoen masa,katroh bak jatah
Kabeh kuliah,di sidek ayu
Laju loen teuka,nibak mak ngoen yah
Mandum loen peugah,masa yang lalu

Adak pih dimak,kadeungoen ayah
Seudia bagah,seugala dumpu
Hingga seulangke,laju jak peusah
Keudeh geulangkah,ngoen sigra laju

Cukop that elok,gunong seulawah
Leumpah that ceudah,deuh la'ot biru
Masa kateuka,kajeut grak langkah
Dua thoen leupah,masa berlalu

Nibak seulangke,laju loen seurah
Uloen yu langkah,keudeh menuju
Pajan keuh watee,uroe geu peupah
Uloen meunikah,ngoen adek ayu

Adak jeulamee,kalheuh loen keubah
Laen peukakah,kasiap dumpu
Tinggai preh haba,kiban yang kapah
Hate loen gundah,seubab goh meupu

Bungong sikuntom,harom sileumpah
Keubit that indah,oh watee taeu
Diloen masa nyan,keubit seb susah
Dak jeut beubagah,meunikah laju

Dua thoen tapreh,bukon keuh mudah
Seubab seb susah,tapeutheun rindu
Uroe ngoen malam,teubayang wajah
Dak jeut beu bagah,laju meunyatu

Bacut ceurita,keudeh loen peugah
Seulangke langkah,katroh geutuju
Saleum kageubi,geudeong bak teras
Pinto geupeuhah,ban geu'eu teungku

Tamong udalam,keunoe neu singgah
Geukheun le ayah,siadek ayu
Lheuh nyan geutamong,geuduk cukop pah
Memang that ramah,bak geupeulaku

(Geutanyong le Ayah dek Ayu)

Puna tujuan,teungku meutuah
Dipat neulangkah,pujeut loen teupu
Dan puna hajat,neu cuba peugah
Loen kalon wajah,sang nasipupu

(Geuseu'ot tgk seulangke)

Trimong geunaseh,yang cukop luah
Katatem papah,komoe hai teungku
Kamoe beurangkat,di gampong pandrah
Keunoe meulangkah,kamoe meutamu

Hajat that rayeok,keuneuk meupeugah
Alhamdulillah,katroh loen saweu
Meunoe hai teungku,laju loen peugah
Kamoe meulangkah,bungong meujak eu

Seubab najanji,dua thon leupah
Ngoen aneuk kak mah,hideh ditimu
Watee kasampoe,dua thoen leupah
Katrok bak jatah,kamoe meujak eu

Janji masanyan,oh lheuh kuliah
Waknyoe meunikah,meunan loen teupu
Dua thoen katrok,lage dipeugah
Maka meulangkah,kamoe jak saweu

(Geuseu'ot le ayah si ayu)

Cukop that beutoi,lege neu peugah
Memang that jeulah,haba bak teungku
Dile masanyan,pakat pih kapah
Oh beh kuliah,meunikah laju

Tapi hai teungku,loen lake meu'ah
Sinyak kaleupah,u aceh timu
Hideh kadiduk,seujak meunikah
Ban beh kuliah,na ureung jak eu

Loen pikee diloen,yang nyan dipeugah
Rupajih salah,bit tan loen teupu
Meuah kamoe nyoe,teungku meutuah
Kamoe kasalah,pileh meunantu

Jinoe sidara,kalheuh meunikah
Cit ban that bagah,ka dua minggu
Bukoen han meutung,nyan aneuk kak mah
Uloen meusumpah,bit tan loen teupu

( Geuseu'ot tgk seulangke )

Meunyoe kameunan,yangka neupeugah
Droe neuh tan salah,bit tan neuteupu
Kaneupeukawen,ngoen ureung salah
Kon yang jipeugah,ureung yg jak eu

Bek citle neudhot,but pih kaleupah
Kadimeunikah,kakeuh nyan laju
Talake bak poe,bekle meupisah
Beubek cit susah,hudep beu makmu

Kahana judoe,ngoen aneuk kak mah
Kamoe kapuas,pih kameuteupu
Meunyoe lagenyan,teungku meutuah
Loen jak woe bagah,loen jak peuteupu

Rindu lam hatee,hanpat loen peugah
Meukon bak Allah,uloen meungadu
Uloen duk sidroe,hana gairah
Maken meutamah,hatee menggebu

Hoka seulangkee,hana loem leumah
Ciban yang jeulah,hanalom meupu
Uroe kaseupot,golom trok langkah
Hana loen minah,mantong uloen eu

Hingga ka mugreb,uroe kaleupah
Seumaken susah,hana loen teupu
Akhee loen beudeoh,loen cok sajadah
Ka umeulasah,loen peutoe laju

Oh lheuh Seumbahyang,jaroe loen tadah
Keudeh bak Allah,loen lakee bantu
Kabeh seuleuso,ohnan kasudah
Uloen woe bagah,loen jak pajohbu

Meubaroe teuka,seulangkee leumah
Katroh geulangkah,bak loen geutuju
Pinto loen buka,laju le bagah
Uloen yu langkah,bak ruwang tamu

Cukop that rumeh,loen kalon wajah
Dilon hai sahbah,loen tanyong laju
Ciban hai teungku,hideh geupeugah
Padum yang kasah,jeulamee teungku

Meunan loen tanyong,teusut lam babah
Neu tulong peugah,mangat loen teupu
Pukeuh na siploh,atau limong blah
Hatee loen susah,wahee e teungku

Kabunoe uroe,uloen geulisah
Hana loen minah,uloen duk dikeu
Loen preh teungku woe,keunoe neu singgah
Aci neu peugah,nibak loen laju,

( geuseu'ot tgk seulangke )

Katroh loen teuka,keudeh loen langkah
Mandum kajeulah,ka uloen teupu
Gata hai nyak e,mebek keuh susah
Hatee beutabah,gata bek karu

Seulaen yang nyan,puna takeubah
Sidara ceudeh,yang bek nyak ayu
Kareuna bunoe,meunoe geupeugah
Ureung takeubah,kalheuh gob jak eu

Yang gata preh preh,taneuk meunikah
Dijih kaleupah,u aceh timu
Kalheuh meukawen,sicanden mirah
Kadimeunikah,ngon laen teungku

Gata bek rangoe,dan cit bek susah
Ka kheundak Allah,lagenyan laku
Bekle tapikee,keuyang kaleupah
Laen meutuah,jinoe tajak eu

(Meugeudhum lam jantongkuh,watee loen deungoe lagenyan geupeugah)

Hancoe Harapan,mandum kapunah
Janji meunikah,dijak lam pageu
Mandum teupeuro,anco sang gapah
Seupot sang leumah,donya uloen eu

Paneuk pikiran,nyan ban loen peugah
Dakjeut loen peuhah,loen buka kubu
Ureung loen cinta,kagob meunikah
Saket meuleumpah,beuna neuteupu

Dua thoen masa,loen preh ngoen tabah
Akhee jih kisah,kagob yang padu
Hantroh ban hajat,harapan punah
Ditem bi darah,lam ie dijampu

( Akhejih loen seu'ot bak seulangkee )

Meunyoe kameunan,yang teungku peugah
Beuthat goh ikhlas,kakeuh hanapu
Mungken jodoh loen,kelheuh geukeubah
Laen le Allah,keuloen bercumbu

Bah keuh loen peutheun,hatee yang gundah
Beuthat pih susah,kakeuh hai teungku
Bungong loen pula,lam taman indah
Akhee jih punah,tanpa loen teupu

Bahle keuh jinoe,gampong loen keubah
Loen ayoen langkah,holaen laju
Peupuleh hatee,yang ka meudarah
Bak mak ngoen ayah,loen lakee restu

.....

Akhee jih singoeh,uloen beot langkah
Tan meuhoe arah,barat ngoen timu
Pukeuh u tunong,atau udayah
Pokojih langkah,kaloen beot laju

Akhee jih meunoe,lagenyoe kisah
Hai rakan sahbah,keubit that tunu
Seupo keuh hatee,yang han meudarah
Acie neu peugah,nyoe meunoe laku

Seuleusoe .....
Ttd : Nardi Dinata ( Munardi )
Di Cot Mane Gandapura Bireuen