Gadeoh Seutia

Keupu keuh guna tapula kacang,
Meunjoe oeh lheuh njan hana tahiroe,
Keupue keuh guna keuloen tasayang,
Meunjoe oeh lheuh njan hana tapakoe,

Loen cinta gata tamseei bak pisang,
Sabee beuragjan hana loen tuwoe,
Beuthat katakoeh hideh bak uram,
Njang namun pisang timoeh loem dudoe,

Saweub natuhah mantong bak uram,
Akan pisang njan timoeh loem keudroe,
Meunan keuh tamsee loen ibaratkan,
Gata loen sayang sabee loen pujoe,

Teutapih pakoen laen that sayang,
Keuloen hai intan meunan that bagoe,
Hanja bak karana bacut salahan,
Keuloen hai intan hana tapakoe,

Pukeuh lagenjoe njang geukheun sayang,
Seutia intan gata keuloen njoe,
Pukeuh seutia hanja keuh oehnan,
Pakoen meunoe ban gata hai adoe,

Susah payah loen lhoep ateung blang,
Tatem jak reupang ateung tagilhoe,
Pakoen that sampee meunoe ban macam,
Bek lah keuh meunan wahee cut putroe,

Tulong meungerti hai bungong lawang,
Bek keuh lagenjan antara tanjoe,
Sama mengerti saboeh tujuan,
Pasti hai intan bahgia dudoe,

Sama geuntanjoe saleng peutimang,
Gaseh bek rincam meuwoe keu phang fhoe,
Meunjoe nasalah meu'ah beurijang,
Bek tamsimpan saket lam asoe,