"Jak Kuliyah Dibanda"
Bak sang kareudoek rah ditoeh ujeun,
Awan meulinteung rap hitam warna,
Bah loenci tuleh meusaboeh jangeun,
Keunoe uloen leung dalam beranda,
Ngoen Haraf siploh wahee eo adun,
Neu cuba keuh lum beutoi puhana,
Meupat nasalah neupeugah aduen,
Bek cuma neulum hana komenta,
Jadi hai rakan meunoe hai aduen,
Neuci keuh peunyum haba loen rika,
Meunyoe bit salah yangka uloen kheun,
Adak pih neu glung beungeh loen hana,
Saboeh ceurita yangka loen teumeung,
Ramee jinoe dum bak akhee masa,
Hideh digampong bacut uloen kheun,
Hinan hai aduen mula fhoen haba,
Tamat SMA hinan dibireuen,
Lheuh nyan hai adun kuliyah teuma,
Meunoe ceurita bak mak jih jikheun,
Sira dimagun bak dapu ngoen ma,
Beklee kuliyah hai mak diBireuen,
Rakan loen mandum hideh di Banda,
Diloen pih keudeh bak mak jih jikheun,
Hinoe dibireuen meumangat hana,
Meunyoe disideh ramee ureung dum,
Hinoe dibireuen hanacan hai ma,
Asai kasepoet katakoeh naleung,
Meunyoe dibireuen leubeh goet hana,
Geuseu'ot dimak bak aneuk neukheun,
Teuma jeh naleung meusoe koeh teuma,
Leubeh goet mantong hinoe diBireuen,
Tansoe peureumeun meunyoe diBanda,
Alah dimak nyoe cukop meujameun,
Meunyoe diBireuen hanajan loen ma,
Teuma soe kaloen hideh tan aduen,
Meunan keuh neukheun neuseu'ot lema,
Hideh hai mak ramee yang peureumeun,
Puloem ramedum rakan sIkula,
Tinggai bak kos tabayeu buleun,
Meunan keuh dikheun dirayu poma,
Geupikee pikee geupeunyum peunyum.
Kakeuh jeut geukheuh diteubit haba,
Ban singoeh uroe oh lheuh dimagun,
Peusiap mandum neuk jak uBanda,
Hana trep masa katroh sibuleun,
Getthat meubajeung akai sidara,
Dijih kalalee sabe bak neuheun,
Aleh pudilum lam peurdee bangka,
Koenlee kuliyah yang dipeureumeun,
Gadoeh dimeulum bak jamboe sira,
Dimak digampong geotthat ceumpulun,
Abeh blang ngoen krung peng geujak mita,
Geujak tung upah bak rata ureung,
Deumi keu eumpeun aneuk dibanda,
Kadang pajoh bu dimak ngoen boh trung,
Kadang geutalum lawoek ngoen sira,
Tapih dianeuk macam peukateun,
Tan dipeureumen kuliyah hana,
Hinoe diBanda laloe meu uem uem,
Ngoen abang ma'un gadoeh meucinta,
Asai kamalam katroh dijak tung,
Nyan ban peukateun hinoe diBanda,
Ureung syik sideh katinggai tuleung,
Habeh man mandum keujih neupeuna,
Deumi keu aneuk rela droe geutheun,
Beuthat lam apui geutem usaha,
Adak pih saket teutap geupeutheun,
Dak sijuk seu'um teutap neusaba,
Cukop geuharap sukses meu teumeung,
Beujeut keu ureung sidroe sarjana,
Tapih dianeuk tanna diboeh yum,
Ciban keuh geutheun sampe droe geuh jra,
Uroe keu uroe meugantoe buleun,
Sinyak dimadeung prut pih karaya,
Hasel bak duk duk sideh bak neuheun,
Nyan keuh meuteumeung hasel usaha,
Tapi hai rakan hana cit mandum,
Koen cit uloen kheun mandum peusama,
Ramee cit laen yang mantong meuyum,
Yang beutoi ureung jak bak sikula,
Ohnoe keuh dilee haba lam jangeun,
Pat yangna kureung meu'ah beusigra,
Kadang bak peugah kaleubeh meukheun,
Maklum tan tuleung bak lidah hana,
Komentar
Posting Komentar