Deurita Hudep

By: Nardi Dinata

Bukoenle sayang siticem tiyong,
Dalam keunurong eumpeun jihhana,
Keubit that peudeh hudep loen arong,
Meubuleun meuthoen seudeh loen rasa,

Pakoen keuh meunoe hudep loen tanggong,
Peudeh that untong oya rabbana,
Kalheuh loen coba jak adue untong,
Tapih nasih loen mantong meurana,

Jalan usaha kalheuh loen arong,
Tapi tan untong rugoe dum yangna,
Loen keurja bak gob pih tanna untong,
Teutap nasib loen mantong meutuka,

Sabee loen saba meubuleun meuthoen,
Beuthat hudep loen dalam derita,
Pajan meu ubah akan nasib long,
Beklei loen tanggong lagenyoe jeumba,

Pukeuh loen pubut mangatna untong,
Beklei hudep loen deungoen ie mata,
Putra keuh jalan beujeut loen arong,
Mangat hudep loen meuwoe bahgia,

Neubuka jalan e poe neu tulong,
Beklei hudep loen dalam derita,
Kanasib hudep meunoe loen tanggong,
Harus loen aroeng beuthat meurana,

Neubuka jalan raseuki keuloen,
Mangat glah untong oya rabbana,
Beklei lagenyoe hudep loen tanggong,
Han sanggob diloen bak sang loen rasa,

Kaneubi hudep lagenyoe diloen,
Neu buka keuloen jalan usaha,
Hana solaen yang akan tulong,
Meukoen yarabbon droe neuh yang esa,

Uloen peucaya kuasa rabboen,
Bahwa hudep loen akan bahgia,
Teutapih pajan meuwoe nibak loen,
Hudep loen arong masa bahgia,

Sayang that leumoe diklik diranggong,
Lam uroe tutong sopinah hana,
Sayang that nasib yang uloen tanggong,
Peudeh that untong nasib loen rasa,

Pakoen keuh nasib meunoe ateuh loen,
Dumhoe loen arong mantong derita,
Puyang loen pubut rugoe loen tanggong,
Pakoen hudep loen lagenyoe that jra,

Wahee e poma yang that loen rihon,
Neu do'a keuloen hudep bahgia,
Bekle derita hudep loen tanggong,
Wahee poma loen neu kirem do'a,