Hana Judul

By: Nardi Dinata

Bak ie meucek crek Tanyoe tatheun bubee,
Mangat roh sabee udeung meusareung,
Seugolom panyang haba loen ratee,
Meu'ah loen lakee bak mandum ureung,

Kadang bak haba kateupee hatee,
Hana tathee thee dosa katatung,
Kareuna dosa tamsee ban watee,
Meunan hai guree bagah meusareung,

Reudok di sigli ujeun disaree,
Banjir lam keudee gabuk dum ureung,
Meupu keuh haba nibak nyoe watee,
Tulong neubithee hai teungku aduen,

Puekeuh nasehat ataupun lapee,
Bek malee malee neu balah jangeun,
Kadang meuturie bak saboeh watee,
Cit hana teuntee kadang meuteumeung,

Dibineh pasie timoeh bak seukee,
Teumpat ceurapee hinan dimadeung,
Hinoe geutanyoe meuturi dilee,
Dang dang hai guree meuteumeung langsung,

Reubah bak panah but angen badee,
Lam krung meuruyee keunan meusareung,
Meunyoena salah meu'ah loen lakee,
Bak loen meuratee kateukhok bak rung,

Hana that saket meukhok ngoen palee,
Nyoe teupeh hatee han'ek tapeutheun,
Saket that tutoe ngoen keunong palee,
Puloem hai guree haba meubajeung,

Tajam that lidah nyan cit kateuntee,
Jeut takheun lagee tamselan peudeung,
Kareuna lidah tan timoeh bulee,
Lheuh nyan hai guree hana meutuleung,

Yoeh goh tapeugah tapikee dilee,
Bek eunteuk akhee kagob khok bak rung,
Kakeuh sep ohnan meumada dilee,
Ohnoe hai guree haba loen sunyung,

Buhu lam pakhok meutuka ulee,
Maklum tan guree diloen hai aduen,
Tansoe peurunoe cara meuratee,
Kakeuh uloen plee ciban yang diplung,