Harapan Hantroeh Ban Hajat

By : Nardi Dinata

Tanyoe meulakee,bak gob taharap,
Diyupreh siat,payah tasaba,
Panena mungken,geutanyoe karat,
Adak pih beuthat,galak dimata,

Bahpih bak akhee,hana cit meupat,
Yang tanyoe harap,teutap cit hana,
Kakeuh taim droe,beklee taingat,
Atra kamangat,galak dimata,

Meunyoe tabithee,peugahsiat at,
Sang sang takarat,bagah jubeuna,
Leubeh goet taim,beklee taharap,
Laju taanggap,atra nyan hana,

Meunyoe kageubi,bek cit taupat,
Adak pih beuthat,galak tanlena,
Teutap cit tacok,beuthat kateulat,
Atra kamangat,meunanloem hawa,

Karoh talakee,meuheutteuh that that,
Leumah lagak that,tapandang rupa,
Padahai hajeut,geubi tanyoe mat,
Tapi wap seubab,katanyoehawa,

Geu keuneuk kheun han,bak sang tan mangat,
Kakeuh preh siat,meunan keuh haba,
Ditanyoe galak,kakeuh preh siat,
Adak pih beuthat,hantrohban cita,

Bak trep keutep,pasti teuingat,
Rasa han mangat,bak sang teurasa,
Kakeuh lah geubi,laju geuyumat,
Bah pih tan minat,galak tanlena,

Karna teulanjur,dileeawai that,
Katanyoe harap,ditanyoe beuna,
Meunyoe kageubi,tacok juleugat,
Adak pih beuthat,galak teuh hana,

Bek takheun sapu,tacok jutamat,
Bekna lam kasat,gobnyan taceula,
Karna salah droe,dilee taharap,
Jan yang geu intat,hanpat meuhaba,

Bah pih lam hatee,hanalee mangat,
Seubab katrep that,meuheut dimata,
Ban katan galak,baroe geuyumat,
Ditanyoe teutap,bek masam muka,

Nyan ban keuh mantong,bacut loen surat,
Haba lam radat,meupadum punca,
Teuntang meulakee,bak goeb taharap,
Bacut loen radan,lam bentuk sastra,