Meumacam Macam Cinta

By: Nardi Dinata

Nuroeh oen kayee,leukang bak tangkee,
Dipoet angen glee,cukoep that teuga,
Buleun deungoen thoen,meutuka sabee,
Meunan cit watee,meutuka tuka,

Masalah CINTA,loen cuba ukee,
Lam bentuk Ca'e,loen radat Sastra,
Seugolom panyang,loen tuleh Ca'e,
Meu'ah loen lakee,bak ureung baca,

Kadang na gasa,jeut teupeh hatee,
Bak loen meu Ca'e,meupansi haba,
Meu'ah hai rakan,baten ngoen lahee,
Mangat bek sampee,diloen meudosa,

Gunong seulawah,indah bukoenlei,
Timoeh bak kayee,seugala rupa,
Wahee saudara,kuta deungoen glee,
Neu izin watee,uloen meuhaba,

Neucuba baca,sira neupikee,
Ngoen mata Hatee,neuci peurasa,
Beutoi ngoen salah,neu timang pikee,
Bek salah taksee,han meuhoe makna,

Doenya katuha,cit karap reulee,
Karap troeh watee,kiyamat teuka,
Meumacam CINTA,timoeh lam hatee,
Nayang jeut reulee,putoeh saudara,

Cinta keu HARTA,pih saboeh lagee,
Yangna teupikee,hanya keuharta,
Keu Allah tuwoe,tanna dipikee,
Seubab lam hatee,cit cuma harta,

Sabee diharkat,mita hantoem pree,
Lam jeut jeut watee,siboek ngoen harta,
Tanna teu ingat,laen dipikee,
Yang peunteng wasee,meuteumeung laba,

Doenya katuha,indah bukoenlee,
Meuhias sabee,ceudah lagoina,
Ngoen ureung tuha,uloen boeh tamsee,
Umue rap cayee,rap woe bak esa,

Oh taeu wajah,cantek bukoenlee,
Geuhiyas sabei,beungoeh ngoen seunja,
Seudangkan umu,cit karap matee,
Meunan keuh tamsee,umpama doenya,

Cinta manusia,keu galak hatee,
Yang peunteng sabee,hudep bahgia,
Macam peukateun,leumah kalahee,
Yang ganjee ganjee,kata'eu nyata,

Cinta keu DOENYA,lam seunang sabee,
Yangna dipikee,hudep bahgia,
Pubut puyang jeut,asai nawasee,
Hana dipikee,haleu ngoen riba,

Cinta keu NAFSU,leubeh loem jahee,
Rata sagoe bee,lahee manusia,
Dum aneuk bajeung,jinoe kalahee,
Kuta deungoen glee,kasama saja,

Dipubut maksit,hanatom napree,
Cinta meugambee,nafsu beulaka,
Yang muda muda,hansoe ek thamlee,
Nibak but bakhee,galak lagoeina,

Kadimeuzina,bak bineh pantee,
Sampoe kalahee,aneuk tan dosa,
Disewa teumpat,dibayeu wasee,
Ngat puwas hatee,lagee dihawa,

Yang dara dara,hana maleilee,
Kajeut keu lontee,ramee jinoeka,
Kareuna nafsu,han'ek jitheunlee,
Sampoe ngoen tokee,ditem meuzina,

Nyan ban keuh macam,doenya kaakhee,
Cinta yang lahee,meumacam rupa,
Padumna sayang,watee tapikee,
Oh watee matee,sapu tan taba,

Yang meubahgia,ureungna pikee,
Allah lam hatee,sabee geupuja,
Hanatom tinggai,ibadat sabee,
Ohka hanalee,cukop mulia,

Cinta Keu ALLAH,Lam jeut jeut sabee,
Adak geupikee,koen cuma doenya,
Akhirat pihna,donya pih hasee,
Mandua hasei,yang geukeurija,

Meunyan keuh hamba,seunang bukoenlei,
Adak oh matee,meuninggai doenya,
Uroe kiyamat,bak uroe pagee,
Bak dhoe meublei blei,dibeudoeh cahya,

Ohnoe keuh haba,bacut loen ukei,
Lam bentuk Ca'e,loen susoen kata,
Watee neubaca,beuna neupikee,
Haba loen peulei,kadang meuharga,

Kalheuh yoeh awai,meu'ah loen lakee,
Bak fhoen loen ukei,karangan loenba,
Meunyona gasa,kateupeh hatee,
Meu'ah loen lakei,kali keudua,

Ngoen Hadanallah,peunutoep Ca'e,
Awai ngoen akhee,meu'ah beuraya,
Haba karangan,lam bentuk Ca'e,
Neuci keuh pikee,beutoi puhana,