Peularha Lidah

By: Nardi Dinata

Deungoen beureukat,rahmat potallah,
Yang maha murah,ngoen bijak sana,
Ka'ek loen tuleh,saboeh peuneugah,
Keunoe loen kisah,lam bentuk sastra,

Uloen pujoe poe,sidroe potallah,
Yang uloen seumbah,Allah ta'ala,
Yang peujeut langet,ngoen bumoe luwah,
Hanya keuh Allah,sidroe poe Esa,

Seulaweut saleum,keu Rasulullah,
Keukaseh Allah,yang that mulia,
Seureuta sahbat,hana teukeubah,
Loen ireng jatah,sekeluarga,

Ureung syik dua,mak deungoen ayah,
Do'a loen tadah,beuseujahtera,
Beusehat tuboeh,raseuki mudah,
Amin ya Allah,neu kabol do'a,

Hanya keuh ohnan,keu mukaddimah,
Keu ulee kisah,nibak fhoen mula,
Loen keuneuk,tuleh saboeh meunalah,
"PEULARHA LIDAH"judul loen peuna,

Bunggka bak panjoe,keunong bak panah,
Gapeuh meuruah,angen badeba,
Leupah meututoe,teulanjoe peugah,
Meuwoe musibah,akan tarasa,

Hana meutuleung,diduk bak lidah,
Tapih yang jeulah,tajam leumpahna,
Leubeh bak peudeung,yangka meuasah,
Kubu teuh teuhah,nyoe salah haba,

Bak tameututoe,teulanjoe peugah,
Karhoet keu salah,cukop bahaya,
Maka hai kawoem,deungoe loen peugah,
Bek that gegabah,bak neu meucakra,

Tajaga narit,bek leupah leupah,
Peularha lidah,yoeh goh binasa,
Beuhati hati,dan loem beujeulah,
Watee tapeugah,ngoen kawom lingka,

Tamseelan labang,yang ban tapinah,
Teutap meubekas,beurangjan masa,
Meunan keuh tutoe,tamsee loen peugah,
Dak lheuh tameu'ah,beukas mantongna,

Hanya keuh ohnoe,bacut loen kisah,
Peularha lidah,tuloeng tajaga,
Bek sampee acoe,hana faedah,
Yangna meutamah,meusalop dosa,