Saba Hai Rakan

By: Nardi Dinata

Nyoe teutop gaki,diteubit darah,
Asoe teuh beukah,saket tarasa,
Geutanyoe hudep,cit jai masalah,
Kateuntei susah,awai tarasa,

Hudep nyoe siat,teumpat tasinggah,
Seunang ngoen susah,pasti tarasa,
Sehat ngoen saket,neubi leAllah,
Nyan cit kajatah,geutanyoe hamba,

Beu that kasaket,sahoe han leupah,
Teutap keu Allah,taingat beuna,
Geutanyoe pujoe,sidroe poe Allah,
Adak pih susah,yang tanyoe rasa,

Geutanyoe hamba,ikoet peurintah,
Legee neu peugah,meunan takeurja,
Ban Hadis Nabi,ngoen Firman Allah,
Meubek tabantah,geutanyoe hamba,

Tapubut suroeh,peujioeh teugah,
Bek roeh talangkah,bak but meudosa,
Keudeh nibak poe,lakee bak Allah,
Bek sampee leupah,syaitan peudaya,

Beurayoek saba,ateuh musibah,
Beuthat pih susah,hana meudaya,
Bak saboeh saat,jeut tacoek hikmah,
Hudep yang susah,meuwoe bahgia,

Yang peunteng saba,tanyoe beutabah,
Cobaan Allah,meumacam cara,
Tanyoe geu uji,deungoen musibah,
Pu'ek keuh tabah,atau pun hana,

Hinan keuh dali,nyata sep jeulah,
Watee musibah,yangka tarasa,
Allah neu kaloen,ciban keuh tingkah,
Oh watee susah,Allah bribala,

Meunyoe tasaba,walaupun susah,
Alhamdulillah,meuwoe bahgia,
Ka'ek tapeutheun,deungoen musibah,
Sayang that Allah,keu yang nyan hamba,

Hanya keuh ohnoe,bacut peuneugah,
Ca'e loen ruwah,meu dua banja,
Yang hana beutoi,atau pun salah,
Loen lakee meuah,nibak syedara,

Uloen akhiri,ngoen hadanallah,
Meuribee meu'ah,seugala dosa,
Bak rakan ca'e,yangka neulangkah,
Seumoga Allah,geulindong gata,

Amiiii....