Seugolom Teulambat

By: Nardi Dinata

Seugolom tuboeh meubaloet gafhan,
Seugolom badan tamoeng keureunda,
Seugolom nyawong teubit lam badan,
Ingat hai rakan suroeh rabbana,

Ingat keu matee oh katroek bak jan,
Bumoe tatinggai ngoen keluarga,
Ubena harta ngoen keukayaan,
Mandum atra nyan sajan tan taba,

Tinggai didonya harta meukuyan,
Tingaai tanoh blang ngoen reumoh raya,
Keudeh lam uruk tuboh geupeulam,
Bajee bak badan gafhan ngoen ija,

Laen tantaba oh tawoe keunan,
Cuma amalan nyan pih meunyona,
Didalam kubu lam tanoh sinan,
Hanale tilam kaso meubusa,

Cukop that seupoet dalam kuburan,
Meungoen teuh pihtan wahe syedara,
Meunyoetan taba,keunan amalan,
Keungoen hai rakan limpeun ngoen kala,

Siksa pih sabei hana pree rakan,
Uroe ngoen malam malaikat siksa,
Tip tip oh geubi ngoen pertanyaan,
Tanna jawaban tateupu hana,

Seumasa hudep mita amalan,
Meubek hai rakan tasia sia,
Saleng membantu seusama insan,
Meubekna deundam lam tuboeh gata,

Iri dan deungki ngoen keusombongan,
Ban lhee atra nyan bekna lam jiwa,
Riya teukabo meunan cit saban,
Pinah lam badan wahee syedara,

Makanan riba meubek takuran,
Beuyo keu tuhan akan keu dosa,
Kareuna matee hana tatujan,
Tanyoe meuninggai didalam donya,

Seugolom nyawong pisah ngoen badan,
Pubut hai rakan bak jalan beuna,(r)
Taharap ridha bak poe teuh tuhan,
Dalam kuburan bek keunong siksa,

Hanya keuh ohno,bacut tulisan,
Uloen keumarang,lam layeu kaca,
Meupatna salah,ngoen keusilafhan,
Meu'ah beurijang,wahee saudara,