Macam Macam Usaha

Oleh : Nardi Dinata

Bah loenci keutik meu dua banja,
Dalam beranda keunoe loen tuleh,
Laen pih tan buet hana keurija,
Bah loenci rika meu padum bareh,

Nibak awai fhoen saleum loen buka,
Keu ureung gata hinoe ngoen hideh,
(As)Salam'alaikum rakan saudara,
Tuha ngoen muda hitam ngoen puteh,

Glee deungoen gampong sampoe u kota,
Saleum keu gata mandum loen peuceh,
Nibak saat nyoe loen tuleh sastra,
Teuntang malaya nanggroe beulahdeh,

Lagak ngoen indah taeu meunara,
Teuglong meucula kalagee pureh,
Leumpahna ramee keunan yang teuka,
Nanggroe malaya agam ngoen gadeh,

Geujak mita peng koenlee rupiya,
Meumacam cara dirakan sideh,
Ladum bak keudee mita keurija,
Ladom lam rimba lam uteun hideh,

Nibak bangunan hinan ladomna,
Dalam uroe kha reu'oh beureuteh,
Didalam keuboen sawet geupula,
Ladom loem teuma bak gudang meuceh,

Nayang hana buet meuputa puta,
Cukop deurita ladoem diwareh,
Nayang kadidroep tamoeng peunjara,
Nayang ba ganja jak peubloe keudeh,

Macam geuilah seugala cara,
Haleu ngoen riba ladom geusapeh,
Tanna geuteupu nyan but meudosa,
Teutap geuraba geuculoek lam keh,

Teuma yang ladoem laen loem cara,
Moto kageuba dalam glee hideh,
Nayang musibah bak geukeurija,
Hinan keuh masa raseuki habeh,

Geu keubah gampong ngoen keluarga,
Untuk mangatna bek sabee seudeh,
Ladoem jak keunan modal geumita,
Untuk usaha digampoeng sideh,

Teuma yang ladoem yang muda muda,
Golom sep dana neuk lamar gadeh,
Majih keunan laju geuteuka,
Dua thoen masa tempoe kahabeh,

Memang that panyang meunyoe ceurita,
Cit kana saja napu tatuleh,
Bahkeuh loen peusep ohnoe meumada,
Peunutoep rika trimong geunaseh,